Far Away From Home

日常生活，總係離唔開偷呃拐騙，只係視乎程度深遠同你知唔知道。警訊常客往往都係本地人，但其實遊客同外地人都經常比人呃，而往往因為佢地比普通人闊綽，出事後又無從哭訴，所以佢地頭上面好似鑿住個「水魚」兩隻字。

話說 Lo 去旅行，見到有條友大肆宣傳有平價海鮮靚蝦食，只係六蚊斤！平到！不過水路幾遠，要坐佢地專車去食，都唔知係咪賣豬仔？不過既然咁平，咪試下囉。二話不說，梗係坐呢家店既專車去食。

坐到屁股開花，到咗，搵野食先算。

老闆：「六蚊斤賣晒！」
Lo：「下？賣晒？咁仲有咩食？」
老闆：「呢啲、呢啲同呢啲。」
Lo：「點賣呀？」
老闆：「四十八，五十八同八十八蚊斤。」
Lo：「岩岩之前有人問係二十八同三十八咋喎！」
老闆：「嗰啲係熟客！」

呢啲咪叫海鮮價（任佢講）！我呢啲咪水魚囉（蠢人）！

荒山野嶺，似乎呢餐唔食都無機會走喇！唉！