Far Away From Home

唔少人都覺得讀電腦既人就等於識整機，仲要係咩機都識整。唔識呀？「咁渣架」！不過我都講過，呢個係誤會，識得整機只係我地誤打誤撞學曉既技能，好多進修課程同大學都唔係教整機，正如識煮餸通常會幾識食一樣，不過無一定架嘛。

咁軟件設計工程師做啲咩既呢？

要明白我地要做啲咩，就要明白我地啲拍檔係做緊咩。通常開發一個程式，會有三大要職：

１．編程員 (Developer)

２．測試人員 (Tester)

３．項目經理 (Program Manager)

測試人員主要係睇下啲功能有無爛到，工作係咪正常，同咪要千方百計整爛個程式，希望將問題搵出來，唔好比啲客見到就唔好，家醜不外傳嘛！編程員最憎佢地因為佢地就係嗰啲專門「斷六親」、「篤背脊」、等事，而最緊要係佢地會指出編程員做錯野。不過無咗佢地，個程式有返咁上下大，都好大機會爛到七彩。

項目經理唔係管人，佢地係管細節同做決定。譬如說，個 MSN 啲人名太長時，究竟係就咁 “Far Away From” 定係 “Far Away From…”，定仰或係 “Far Away From >” 有個箭嘴、再click一下會有全名出來；呢啲咁奇怪既決定，同埋同啲客仔打交道，都係佢地做晒。或者咁講，編程員同測試人員唔做既野，就係佢地食晒落肚架喇！

編程員，就係大家覺得最多聽到既，其實係軟件設計工程師既其中一項重要工作。佢地每日對住啲 0xc00000fd 同 *p++ = *t++ 呢堆野。嘩！一睇就知變態野。當然，除咗呢啲之外，程式既結構同問題，都係我地落手落腳（即係泥水工人！）去做，而渣fit呢樣野，通常我地唔夠啲項目經理惡：佢地最鍾意話：「個大客話 xxx！」

呢一編野係我寫既，去睇下少少喇。

…

你肯定未睇，睇一睇幾眼就得架喇；唔睇你唔明我下面講咩架。

…

好喇，係咪唔知我寫咩呢？正常，明既話你就肯定係做呢行，明既話而唔係做呢行，睇怕你都係入錯行！呢啲就係我地平時見到有個程式炒咗之後，要做既一件事。都幾恐怖架！除咗呢啲之外，對於一個程式點可以做到支持到一日幾百萬人咁，都係我地既工作，即係好似 Google Search 同 Live Search，唔簡單架。順帶一提，通常小企既開發工程小隊，通常會認為最好有齋以上三個職位，先至健全既！

大家又對啲瘋狂編程員又多咗暸解喇！