Far Away From Home

忙咗好耐，叫咗交低啲野比人。一日後，我會去抵達英國，約咗一位小學同學同兩位中學同學，都係熟到爛晒嗰啲，算係補返當年趕住返工而無去到既大學畢業旅行。哈哈，我預咗今次銀紙係咁燒，肯定大出血，不過去得歐洲既人話窮，你係咪會想「中」佢幾鎚先？

不過今次我要去重拾一啲回憶，將細個時既一啲零粹記憶找回來。若果有電腦用，我會寫返少少遊記出來既。希望見到啲有趣既野！

大家覺得樓上幅相係邊度來？

各位，遲咗既聖誕快樂！

折墮呀！唔講咁多喇，自己去睇去對比下！

—

最近好忙，基本上都無寫無睇，搞到走晒啲好野！

日常生活，總係離唔開偷呃拐騙，只係視乎程度深遠同你知唔知道。警訊常客往往都係本地人，但其實遊客同外地人都經常比人呃，而往往因為佢地比普通人闊綽，出事後又無從哭訴，所以佢地頭上面好似鑿住個「水魚」兩隻字。

話說 Lo 去旅行，見到有條友大肆宣傳有平價海鮮靚蝦食，只係六蚊斤！平到！不過水路幾遠，要坐佢地專車去食，都唔知係咪賣豬仔？不過既然咁平，咪試下囉。二話不說，梗係坐呢家店既專車去食。

坐到屁股開花，到咗，搵野食先算。

老闆：「六蚊斤賣晒！」
Lo：「下？賣晒？咁仲有咩食？」
老闆：「呢啲、呢啲同呢啲。」
Lo：「點賣呀？」
老闆：「四十八，五十八同八十八蚊斤。」
Lo：「岩岩之前有人問係二十八同三十八咋喎！」
老闆：「嗰啲係熟客！」

呢啲咪叫海鮮價（任佢講）！我呢啲咪水魚囉（蠢人）！

荒山野嶺，似乎呢餐唔食都無機會走喇！唉！

長年居住於港澳兩地的我，能操一口流利且生動有趣廣東話，既然遠渡而來上海，我家公司又特別多勤奮好學之士，曾長居東方拉斯維加斯，且不是甚麼 ABC ( American Born Chinese )，加上一點背景，我的港式廣話變成了公司友人間的一個標準，並自命為上海朋友間的廣東話傳教士，其實是聲音版的「認字特警」。

話說昨夜，我以及一名在加國長大的港人、還有一名廿多年居於米國的港人司機、與及他的廣州汕頭長大的女朋友，一行四人喝飽吃醉之後，除了駕車的司機，大家都因少量酒精變得更健談起來。四人之中，我的語彙應算是最為豐富及港式，能操最潮之語的人也就非我莫屬。

加國人：「嘩！好食好食！咁都係全世界一百幾廿蚊，抵到爛 [1]！」

女朋友：「無介紹錯呢！」

加國人：「無！仲要我地計埋六『瓶』啤酒！抵玩！」

我：「六『樽』、或者六『支』。」

加國人與女朋友齊道：「下？」

我：「廣東話係唔講六『瓶』，六『樽』、或者六『支』先岩[2]。寫出來先至係 [3] 六『瓶』！」

加國人：「哦！六樽！好！六樽！六支！」

所以，我也要努力自我增值，睇膠登加強潮語能力。

以上都是吳江路小吃街的點滴，現在再貼多一幅吳江路的小楊生煎，是來上海必吃的一家小吃，皮脆可口、肉香汁多。圖片僅剩下兩只，皆因太好吃，忘了拍照。可想而知，不可不吃！

—

[1] – 「抵到爛 」為「很值得很便宜很划算」，譬方「三元十六件小籠包！抵到爛！」。「抵」先「值」的相約意思。

[2] – 「唔」為「不」的意思。「先」可以解為「才」。「岩」是「對」的意思。「先岩」＝「才對」。

[3] -  「先至係」為「才正是」的意思，譬方「他這種態度，先至係沒禮貌！」。

我公司絕對唔係咁豐富

老細澤心仁厚，為免各位戰友國慶捱餓捱渴，特別下令厚待我等一眾小人物，來緊既國慶十一黃金週，來個包飲包食包行！

當然，老細既意思並非叫你去遊埠時吃喝玩樂、坐First「卡屎」、豪比貼士、燒盡銀紙，而係叫你加班坐定定，「我地比其他公司加班服務更加周到！」。加班只係屬於「自願性質」，不過大家呢期咁趕咁忙，得閒死唔得閒病，若果閣下既造化令到美國既人睇唔起中國人既辦事效率，又或者你唔做就無人識做既話，睇怕呢個班都似乎唔加唔得！

尋日 Peter Chen (發明 Entity-Relationship Model 的人) 都話　「受人錢財，替人消災！」！佢岩晒！

我既小隊都有幾位人兄「自告」奮勇參加咗「自願加班」計劃。嘩，好驚呀。

大家真係要好小心買野，同保護自己嘅電腦，昨夜有朋友問我「我新買部 router，你話有無問題？不如你試下攻擊？」，跟住我用咗兩分鐘就幫佢改咗密碼。為咗確認事成，我仲將佢一啲內部電腦資訊寫返比佢睇。

重點係，我由頭到尾係唔知佢既密碼。

點做？詳情如此。呢個係我另外專寫電腦安全嘅扑。

我朋友回應「嘩！你咁同偷睇人沖涼有咩分別？！」。好在佢無講係偷睇「良家婦女」啫！所以，建議大家得閒要檢查自己部機有多危險。問題產品係 Gigabyte 嘅 GN-B46B，認住唔好買喇！

話說有日同朋友極度肚餓，去「大娘水餃」叫咗幾碟雲飩，點知難食程度令人噴血，反應是將所有可以諗到嘅形容詞都用盡。原來都幾多，如下列十款：

「好唔掂喎！」
－唔OK咁解，即係唔到水準，但係叫做放得入口。

「咁難食既！」
－有時食啲豬仔骨、蔗、或者硬到石頭既車厘哥夫紐結糖，食得咁辛苦，好難食。如果一碟如雲飩咁易食既野，肯定係關味道事喇。

「食得好辛苦！」
－當你叫點咗野食，由肚變唔肚，唔想浪費金錢浪費食物，就唯有頂硬上，講返呢句差唔多。

「仲慘過食屎！」
－雖則好多人都無食過，又或者講者唔小心試過下（水箱太勁！），跟住發表如此嘔心既讚嘆。比屎更難吃，實在不容易！

「食到想死！」
－民以食為天，居然食野食到想死，呢餐大概都真係幾難食。

「點食呀？」
－咁唔好味既野，令在場人仕質疑有無唔係用口食既方法去呑食呢道菜，唔通唔係用口食既？

「人食架？」
－動物唔識烹調，世世代代獨孤一味，悶到死，所以人食到唔開胃既野，可以比動物食，雖然有時動物都會反胃…

「餿！」
－豬食既野，對普通人來講，係一堆垃圾一般嘅野，形容食物如此，即係垃圾甚至不如。

「食得架？」
－食物，當然係食得，反問一道食物「係可以吃的嗎」其實就是質疑呢道菜係唔食物之餘，暗喻係連動物都唔會想食。

「嘩！自己走返出來既？！」
－呢句係當食物達到太難食既程度，吐出口外時，老屈件食物自己唔願意入口既講法，相當過盞！

以上係當時同朋友諗到既形容詞，唔知大家對住難食既野，又會有咩反應呢？或者大家有咩好句都可以分享下！